Warning, graphics intensive. K’den. I know I like to take ukubillion photos. Everytime we go holoholo ka‘a I take plenny. I know when I go odda peeps blogs I love seeing plenny photos. Adunno how many chapters dis journey going take… but going be plenny! So hang on! Enjoy da ride.
K’den. Dis is da journey Nolemana and I wen take back down to Los Gatos, California, foa clear out my maddah’s hale, her memorial service, moa packing, and saying aloha to da town wea my maddah wen live foa many years. Was one emotional journey as well as one physical journey, difficult in many, many ways. Now we stay back home again, and oh, so glad to be hea.
Da journey begins.
Meet Musubi. Musubi is one adorable elepani made foa me by my friend Clare from Alohaworld to bring me comfort during dis journey.
Musubi waves to da Aloha flag outside our entryway.
Den he wen check out da new Garmin GPS dat we wen buy foa da trip. My friend Lurkah wen win da “Name Da GPS” contest at Alohaworld. Da inoa? “TryLook”. As in, “Eh, try look wea u going!” Oa “Eh, try look wea u stay taking us!” Oa, “Eh, try look, u lolo, u stay going da wrong way! Recalculating. Recalculating. Recalculating!!!”
Whoo hoo! Try look da first stop Mokihana wen program in befoa we left!
Da first stop stay Hawaiian Beanz, of course. I wen get one Moki Moka, and Nolemana wen get one blended iced mocha.
Eh! Musubi like try da blended mocha! It was now 1:30 p.m. on Monday, August 11th.
On da road foa realz. Dis is just aftah we wen get on I-5 from I-205.
Further along I-5, heading South. Take note of alla green. Cuz in California, get nomo!
Now we stay almost to Albany.
Check out alla sawdust at da Albany paper mill. Always get dis hauna kine “aroma” hea. Is now 2:35 p.m. and 87 degrees.
Further along I-5, we see one foa realz hippie bus!
About dis time we wen stop at one rest stop; stay plenny hot, and I like holoholo litto bit. Dis car wen pull in next to us, and as Nolemana stay getting out, da kane in da car wen ask him, “Eh, who’s da tita?” Cuz get all kine decals on my car and one of dem says, “100% Tita”, which foa u non-locals, I define as a local girl with an attitude. Heh heh. Nolemana wen tell him, “Oh, that’s my wife… I’m just a haole boy.” LOL.
We all wen talk stories for awhile; dey had two of da kewtest keiki I evah wen see. I wen geev um one Alohaworld card so dey could check um out when dey get back home to California. I wen encourage dem to join da Lanai, too. She stay from Hilo, him from O‘ahu like me. Talking stories wit dem was da huge bright spot in my day.
Back on da road again. Open fields along I-5, just North of Oak Creek.
Right near da Corvallis exit, we see fields getting disked. Ho da dust!
2:50 p.m. Moa field work.
Dis is just South of Corvallis.
Is now 2:58 p.m., and we stay just South of Brownsville. Check out da mega bales of hay! Da Coast Range stay in da distance.
3:55 p.m. Still in nani green Oregon, just North of Comstock and almost to Curtin.
5:20 p.m. Milepost 74 near Sunny Valley in Southern Oregon. 90 degrees.
Sexton Mountain Pass.
Sexton Mountain Pass. Southern Oregon.
Still yet, Sexton Mountain Pass.
K’den. Pau Chaptah One. Stay tuned foa Chaptah Two. Wea we leave Oregon, not coming back foa 10 moa days.
*** Alla stuffs hea on my blog stay copyrighted. Dat means photos, words, typos, hamajangs of any kine. If u kakaroach [steal] um, den I going hunt you down and give you da giant slippah and whack u wit um until u promise u nevah going do dat again. And eh! I whack hard and I get plenny menehunes can track u down. Copyright © 2008. The content on this blog is the sole property of the author. Dat would be ME! ***