Da first couple of days in Los Gatos, we wen get started on da enormous job of deciding who was going get wat, how we going hando if two peeps like have da same ting, and how much we going do. Our maddah was not one packrat (like me, but I wen learn my lesson!), but still had plenny stuffs.
Was one huge job. But everybody doing fine wit each oddah. And sometimes in da kakahiaka Nolemana and I wen drive to Peet’s Coffee foa one latte. Coming back to my mom’s hale, we alla time wen see da nani crape myrtle trees. Dey were in full bloom, and wen grieve my heart dat my maddah, who loved dem so much, no stay dea foa seeyum dis year. I nevah seen dem look dis good befoa.
Da colors were glorious!
My maddah’s whole street stay lined wit dem.
I nevah seen so many in my life!
Da memorial service was on da 11th. And it wen go really good. Peeps wen have good stuffs foa say about our maddah, and I wen get to see ‘ohana dat I nevah seen foa ova thirty years. Dat was awesome!
Dat night, my braddah dem wen make plans foa da immediate ‘ohana to go out to eat; good kine closure foa da day. We all wen holoholo ka‘a into nearby Saratoga to dis Pake restaurant. But in ordah foa get dea, we wen holoholo by one Japanese one, and Musubi wen beg to get let outa my purse. Cuz he like see, yeah?
Da place looked ‘ono! Musubi like go dea!
But we stay going hea. See da awesome crape myrtle dea too? Was lidis all ova da place in California.
14510 Big Basin Way, Saratoga, CA, 95070
Right above our table, had dis way kewl ship! I love sailing (used to sail around by Diamond Head wit my papa-san).
Den da grindz wen come. I wen surrepticiously take photos, and if anybody wen ask hakum, I wen tellum, “Eh, stay foa my friends on da Lanai! Is one tradition!” We all wen each ordah one thing so had plenny.
I tink dis was da cashew chicken.
And steamed veggies.
And shrimp wit I forget wat kine sauce.
‘Onolicious to da max!
Had anoddah sailing ship on da odda side of da room.
And dese way kewl aquariums.
Because of da wood, dey almost looked like framed photos.
Pau grind (ho da full and we had nuttin’ foa take home!), we wen go outside. And dea on da wall of da Japanese restaurant, had all dese hibiscus! No way can grow lidis in Oregon.
So nani da blooms.
Close-up. I love dis pink color.
Dey stay climbing up da wall, so high!
And of course, Musubi like get his photo taken wit dem.
“Eh, take one moa, Auntie!” he wen tell me. Wat I could do?
I wen take photos of insai da restaurant foa my friend, Kikue.
Had peeps right near da window, so no could take too many.
Musubi like check out da menu.
From dea, all us guys wen holoholo ka‘a back to Mom’s hale, wea we wen have one awesome ‘ohana time, just talking stories and even singing some of da old mele we knew. To me, dis was da best part of da entire day.
In da next chaptah, Nolemana and I wen holoholo from our hotel across da street to one awesome Farmers’ Market.
*** Alla stuffs hea on my blog stay copyrighted. Dat means photos, words, typos, hamajangs of any kine. If u kakaroach [steal] um, den I going hunt you down and give you da giant slippah and whack u wit um until u promise u nevah going do dat again. And eh, I whack hard! Copyright © 2008. The content on this blog is the sole property of the author. Dat would be ME! ***