So tonight we wen go church. Pau church, I wen go out, get ina car. Heard dis funny kine clickity click noise even befoa I wen put in da key. Da door lights small kine flashing. Oh no! Dead battery?
Wea Lurkah and Koni when I need dem?
I get jumper cables in da car, but dis no acting just like one dead battery. Da clickity click noise no sound lidat.
But one friend jumped us; da car wen start up, but right away wen mahke again. So dey wen doyem anodda time; dis time I wen keep my foot ona gas. Da battery idiot light was on. I sat lidat, thinking of how much gas I stay using up no going no wea. Finally afta about 10 minutes, my gauges [wat kine lolo spelling is DAT! sheesh. Should be gajez!) started foa work again. Kinda spazzing at first doe.
Our friend wen tell us dat could be da alternator. We debated if we could get home. We stay about 12 miles away along dark country roads. Wat if da car mahkediedead along da way?
I wen try let it idle. It did. Da gauges held steady. Julie wen tell us she would follow us part way home till she had to go towards her hale. So we started off.
Julie left us about halfway home; we were doing okay. I know she woulda followed us alla way if necessary.
We got up our very steep driveway and I wen park da car facing out; alla way home I wen keep my rpm’s up so da car no stall. As soon as I wen take my foot off da gas, everything wen go mahkediedead again.
Tomorrow one holiday. Dunno if I going hafto get da car towed in on Tuesday. While it’s at da shop, dey might as well fix da heater cuz nomo heat anymoa and winta stay coming. Oh yeah, and da shocks oa struts oa tie rods oa ball joints oa something kinda groaning.
All I see is $$$$$$$$$$$$$$$$$$$$$$$$$$$$$$$$$$$$$$$$$$$.
I tink I going go pop some bubble wrap.
But I grateful to ke Akua foa getting us home safe. Very very grateful.