Nolemana is doing a bit bettah today; tho he wen wake me up at 5 a.m. foa two pain pills cuz he was really hurting. But throughout da day, he been feeling small kine bettah. Most of my day was filled with mālama [caring for] Nolemana, cleaning da bathrooms, laundry, cleaning da kitchen, etc. It woulda been reeyo easy to get resentful about dat, but it neva wen happen. I was okay, even doe was Maddah’s Day.
Our girls wen bring ova kaukau [food] and we had several hours foa grind [eat] and talk stories. Was good all da way around.
Lataz, when da girls wen leave and Nolemana wen take one nap, I wen come in my office foa hana litto bit. By dis time da sun was out; Kukui, da doggie, wen stand by da sliding door, whining, whining. I wen look out, and oni kewt wat I wen see! Try look! Da litto kewtie was chomping on leaves out dea. I wen consider it anodda Maddah’s Day pressie… dis one from ke Akua. Kinda like one reward foa not complaining on da one day of da yea wen I not sposed to have to hana [work].