Gotta admit da mangoes I can get hea on da mainland stay junk compared to da ones back home. Oni half da flavah of wat I used to just take foa granted hanging heavy on da trees in our front yard. But gotta take wat I can, yeah? So when I wen find one recipe foa mango upside-down cake, I wen decide foa tryum.

Da recipe I wen find was from Wanda Adams book, The Island Plate.

Da photo of da cake wen make me ‘ono foa um. So I wen get out alla stuffs foa make um. I knew no way I can get da full flavah of da cake using mainland mangoes, but wat else I going do, yeah?

I wen make double da recipe, cuz was going take um to Da Gathering dat morning and no like run out. I nevah like da skimpy kine topping, so I wen add moa buttah, moa brown sugah.

Ho da bowls wen take!! Sheesh. Usually when I cook pineapple upside-down cake I use one cake mix foa da cake part. But dis one I wen make from scratch. Even wen use cake flour! Bowl foa dis, bowl foa dat, piling up in da kitchen sink. But ainokea… I jass wen keep going, even knowing dat I gonna have to clean up all up.

Da recipe wen tell me bake foa 40-45 minutes in one 9″ cake pan, but I had foa bake moa like one hour.

I wen lettum sit in da pans foa cool, den wen take um out and huli huli dem. Ho da nani!!

U like see again?

I betchu getting ‘ono foa da cake, yeah? I wen use Craisins instead of maraschino cherries (eh, da recipe wen tell me I can!) cuz I no like cut up alla cherries.

I still get enough left ova foa take to our small group from church dat night. So get peecha of wat wen look like on da insai.

I would make um anodda time, but going take da easy way out wit one cake mix. I gotta say doe, dat da cake part was ‘ono; very light and moist. And I would have to double da recipe foa make wit cake mix in one 13″ x 9″ pan.

Oni lazy me but. Da clean-up I no like!