So eh. Remembah dis humuhumunukunukuapua‘a I wen knit foa Hawaiian Beanz Coffee Shop, my home away from home? Everybody ova dea loves him.
I wen use reeyo coffee beans foa his eyes and da decorations around his tail. So not oni nani da fishie, he also smells good, too!
Try look da mout’! Seems to be saying sometin, yeah? Well, I knew wat was. Cuz I wen knit him, right?
Wat da humu stay saying was dat he stay thirsty! And he like drink one latté! So Mike, one of da owners of da shop wen put our heads togedda foa try figgah out wat to do.
And dis is wat we wen come up wit:
See da humu ‘way up dea?
He get one latté of his own now!
Ho da kewt, yeah?
Now he get his own coffee cup and erryting! Da 20-oz size even.
And not oni dat, when da fans stay on, he moves around like he stay in da ocean!
Mike and I stay plenny hau‘oli wit wat we wen come up wit. I wen think of da cup; Mike wen think of da straw, he he was da one who wen climb ontop da ‘way high laddah foa suspend da humu from da ceiling.
Alla customers like da latté-drinking humuhumunukunukuapua‘a.
And sometin else? Nobody can kakaroach him! Heh heh.