Today is da kine Saturday. Litto bit dis, litto bit dat.
Da odda day I wen go see my friend Dee pau grief class; she and her hubby own dis awesome used book stoa in Clackamas. And wat I wen see up on da counter? Lychee! Dee get dis customer who brings her all kine goodies lidat. When I wen tell her, “Wow laulau, lychee!” Dee wen give me dem cuz she get choke moa at home. Had four, but I wen whack one.
Small kid time, Mr Zane from our neighborhood in Mānoa Valley used to bring us bambucha bags of lychee from his yard. Us keeds would eatum up wikiwiki! Only get four dis time, but da flavor wen remind me of Mr Zane and his generosity.
I wen take dese chree photos in da birdbath fountain outsai my office; den no could wait nomo and I wen eat up dese lychee!
Ho da hot hea lately! I wen get dis idea from one wahine on Ravelry. Da lettuce no stay ready foa eat yet and da barrel stay too heavy foa move, so we wen put one umbrella ova foa protect it from da hot, hot sun!
Undaneat da umbrella, da lettuce nomo da hot sun blasting ontop it.
Stay coming along reeyo great! I tink I going use one leaf foa my sammich tonite!
Da melemele Angel’s Trumpet wen open.
And so did da Rudbeckia!
And I wen pau anodda sock.
Opal Rainforest, Parrot Colorway.
K’den. Pau da kine. I going go harvest litto bit lettuce now.