Back in Octobah sometime, Nolemana and I wen holoholo ka‘a to Hood Rivah, Oregon, to get some apples. We wen come back wit ukuplenny, and wen decide foa make applesauce. I get dis antique apple peeler dat makes da job go fass!
Hea da first batch in da sink:
Nolemana cores da apple, den puts um on da peeler. Den I crank um, and off comes da peel! We first wen try dis wit one moa modern peeler, da kine peels and cores at da same time but was so junk! So I wen get down da old one.
Da apple stay getting peeled!
I had fun trying foa make one supah long peel ova and ova. I stay
one cheap date very easily entertained.
Try look how long dis one!
Dis one pretty shaka!
Da ting I like best about dis peeler, aside from how it makes da work go fass, is alla gears. I love gears. Anykine wit gears, I adore um. Dis peeler get about eight of ’em.
I wen cook down da apples, add cinnamon and some sugar; den we wen puttem in da freezah, anden came da next fun part: feeding da peels to da neighbor horses!
Dis is Sam. He’s used to getting treats from us.
“Ho da ono!” Try look how his lip stay curling around for da peels!
Den Sierra, who stay litto bit moa shy, wen come ova to investigate.
“Oooooh… I like um!!”
Sam no can stand it. He comes ova from ova dea.
Nolemana get hard time keeping up wit da greedy mouths!
Sam going do anykine to get da peels!
Sierra same ting.
Oops, she stay almost dropping one!
Nolemana moves back and forth between da two horsies.
Sam chases Sierra off, but Nolemana make shua she gets her share.
“I adore apple peels!! Mahalo guys!!”