Caution: Full-on pidgin!

Da odda night we wen bring in alla da tropical plants from da lanai cuz was going get below freezing. So today, I stay looking at my kahili ginger plant. Ho, da bugga almost 6′ tall anden!! I had dis plant foa about chree years now, and even doe neva wen bloom, is okay, still reminds me of home.

So I stay admiring da nani green of da ginger and alla a sudden I wen look alla way up at da top. I wen blink. No could be!!! OMG!!! I almost wen shi shi my panties!!!

Try look!!!!

Dat was lass week. Today I wen come in da hale from being gone all day; and da minute I wen step chru da back door, I wen start sniffing. Wat dat was? I wen explore all ova in da kitchen, den wen go into da dining room winter solarium, looked up, and no could believe it again!

Standing there, I felt like I was back home. Da fragrance was overwhelming! I get so much wai maka dat I could hardly see chru my tears, because there, right in front of me, my kahili ginger wen start to bloom!

I jass wen stand dea, tears streaming down my face, as da aroma of dis plant from home wen fill up my senses. Onaona ka pua melemele! [Fragrant is the yellow flower].

It’s hard for stay here at da computer! All I like do is go back to da solarium and get anodda whiff of dat amazing scent! It’s kinda funny… like a fragrance lag insteada jet lag. Am I back home? Am I hea in Oregon? Wit dat heady fragrance, it’s hard foa tell.

It’s not exactly like being back home. But hea, in my Oregon hale, in practically da middle of wintah, I get da fragrance and beauty of home.

I am in awe.